Aktualny naćisk brunicoweho plana prawnisce wotprějomny

Aktualny naćisk brunicoweho plana za jamu Wochozy II ma wulke njedostatki. Je njedospołny a spřećiwja so płaćacemu prawu. Jeli so znowa njewupołoži, je sudnisce wotprějomny. To ma slědowace přičiny:

Hustotna sćěna njeje w planje zapřijata

Na rozjimanju w decembru 2012 su zastupjerjo Vattenfalla wobkrućili, zo budźe so hustotna sćěna podłu sewjerneje a zapadneje kromy planowaneje jamy twarić. Tutu sćěnu sej mnozy ludźo žadaja, kiž so na procesu planowanja a rozwažowanja wobdźěleja. Wobběh dnowneje wody w tutej kónčinje njesmě so mjenujcy dale wohrožować.

Wotpowědne formulacije w cilu 7 su potajkim njedosahace, wšako hustotnu sćěnu ani w planach z nazymy 2011 ani we wobswětowej rozprawje njenamakaš. Wona so tež na žanej wotpowědnej karće njejewi.

Je potajkim trjeba, zo so aktualny plan změni, dokelž so wuskutki hustotneje sćěny w předležacej wersiji njewobkedźbuja. Jeli pak so po wulkich změnach plana potrjechena zjawnosć a zjawne instancy znowa njewobdźěla, je plan sudnisce wotprějomny.

Plan přeńdźe so přećiwo wódnemu prawu EU

Hdyž dnowna woda po skónčenju wudobywanja brunicy zaso stupa, potom so chemisce pohubjeńši  (bruna woda). Tole je přeńdźenje přećiwo wódnej směrnicy a zakonjej wo wobběhu wody. Ewentualne napřećiwne naprawy njejsu předwidźane a za Vattenfall z hospodarskeho wida tež do prašenja njepřińdu.

W předležacej wersiji plana so z toho wuchadźa, zo so dnowna woda njepohubjeńši, wšako dźě so hižo jako "špatna" zastopnjuje. Jeje kwalita so potajkim njezměni. Tole je sudnistwo wospjet jako wopak hódnoćiło. Dnowna woda so chemisce jara pohubjeńši. To je relewantna změna k hubjeńšemu, kiž njeje dopušćena.

Potrjeba wuhla dwělomna

Dwě dobrozdaći (profesorow Erdmanna a Hirschhausena) k potrjebje wuhla a trěbnosći noweje jamy za milinarni w Hamorje a Čornej Pumpje předležitej, kiž runje to nawopačne wuprajatej. Dokelž matej cyle rozdźělne wuchadźišćo a wuslědk, je třeći, transparentny a njewotwisny posudk trěbny.

Wón ma so potom znowa zjawnje wupołožić a rozjimać.

Je-li  potom přeco hišće njeje jasne, kelko wuhla je trěbne, měł so rozsud w zmysle potrjechenych wobydlerjow a přećiwo wotbagrowanju tworić. Přetož w cyłkownym procesu rozwažowanja bu wjace hač jasne, zo so ludźo z Rownoho, Mułkec, Slepoho a Trjebina swojeje domizny NOCHCEDŹA wzdać. Tuchwilu so hižo jednanja wo přesydlenju wotměwaja. To je jenož tohodla, zo bychu wsy na wšitke ewentualnosće přihotowane byli a hórnistwowy koncern swoje zakonske winowatosće spjelnił.

Tuchwilu budźi proces wotwažowanja zaćišć, zo steja hospodarske zajimy hórnistwoweho koncerna nade wšěm. Zajimy ludźi, kiž su wot přesydlenja potrjecheni, kaž tež prašenja přirody a klimy su wočiwidnje wjele mjenje wažne.