Zwjazk so předstaja

Zwjazk "Strukturnu změnu nětko - žane Wochozy II" bu dnja 08. měrca 2013 załoženy, zo by so planowanej jamje a z tym zwisowacemu přesydlenju nimale 1700 ludźi zadźěwało.

Žane Wochozy II

Smy přeswědčeni, zo dźensniši dźeń žane nowe wuhlowe jamy trěbne njejsu. Łužiske jamy, kiž hižo nětko dźěłaja, móža tudyše milinarnje hač do lěta 2040 a dlěje z dosć paliwom zastarać.

Dla najmazańšeho wašnja dobywanja energije dyrbja so wsy resp. wjesne dźěle Rowno, Mułkecy, Slepo-juh, Miłoraz, Trjebink a Trjebin-Za goru z cyłkownje 1700 ludźimi přesydlić. Cyły čwak serbskeje kultury našeho regiona drje by na wšě časy škodu poćerpjeł. Tradicije rěče, narodneje drasty, rjemjesła a twarskeho wašnja su wohrožene, přetož je dwělomne, hač bychu so "socialnje znjesliwe" na druhim městnje zakótwili.

Zdobom so drohotne hona, kotrež buchu přez lětstotki njesprócniwje kultiwowane, prosće wotbagruja. Štož potom zwostanje, su kisała póda, kisałe rěki a jězory, kumštna nowa přiroda bjez wotměny a monotone brjohi, na kotrež drje čłowjek přichodnych sto lět stupić njesmě, dokelž hrozy strach zesunjenja.

Strukturnu změnu nětko

Łužica słuša do regionow w Němskej, kotrež su strukturnje najsłabšo wuwite. A to, byrnjež my tu na dotal najwažnišej surowiznje našeho kraja - na brunicy - "sedźimy". Kak tomu, zo region, hdźež so brunica wudobywa, skoro ničo z toho nima? Dokal da ćeće dobytk tych, kiž jamy wobhospodarjeja, a statneho knježerstwa?

My chcemy za Łužicu: kónc ničenja drohotnych płoninow wsow, přirody, ratarstwa a za turizm. Ale žadamy sej zdobom wot knježerstwa a wobhospodarja jamow tajke inwesticije, zo by region tež po brunicy hišće něšto hódny był. Zachowanje kultury a přirody Łužicy a zesylnjenje infrastruktury steji na prěnim městnje, zo móža sej ludźo tež w přichodźe swój wšědny chlěb zasłužeć, swoje dźěći wotkubłać a sej swój žiwjenski wječork bjez stracha lubić dać.

Konsens zwjazka

Akciski zwjazk ma zaměr, planowanej brunicowej jamje Wochozy II zadźěwać a wsy, kotrymž hrozy wotbagrowanje, zachować.

Za tutón zaměr organizujemy a podpěrujemy informaciske zarjadowanja w regionje a w městach, akcije, kiž maja wulku zjawnu skutkownosć (na př. napominanske straže a jutrowne pochody) kaž tež prawniske naprawy. Nimo toho informujemy wo našim dźěle w interneće a wudawamy prawidłownje informacisku brošuru "Wochozy dźensa" za potrjecheny region.

Nimame definowane čłonstwo ze zawjazkami, ani předsydstwo abo přiradu. Naš zwjazk podpěruje kóždy, kiž z idejemi, skutkom abo tež pjenježnej podpěru na zwoprawdźenju tutoho zaměra sobuskutkuje.
Akciski zwjazk je stronskopolitisce neutralny a nadkonfesionalny. Wot nacionalizma, rasizma a namocy so distancuje.